بسم الله الرحمن الرحيم
السلام عليكم ورحمة الله وبركاته
حبيت أشارككم بطرق بسيطة لوضع خطة جميلة لنفسك
بعيد عن التعقيد ، وبعيد عن حوسة بعض الدورات إلي تطلعين منها ويكون تطبيقك لها شبه معدوم
فيه ثلاث نماذج ممتعة حسيتني ترتبت جدا بعد استخدامها وهي إلي بعرضها لكم
.
.
مدونتي ستحتوي على أربع نقاط:
نموذج خطة شهرية
نموذج خطة أسبوعية
نموذج ترتيب المهام
نموذج تطوير الذات
نبدأ تدوينتنا الطيفة إلي بتساعدكم بإذن الله في تنظيم الأهداف وتطوير النفس
.
.
أولا: نموذج خطة شهرية
القائمة العامودية عبارة عن:
“أدوارك في الحياة”
وهذا نموذج للأدوار ممكن تزيد أو تنقص حسب حالك
هل أنت متزوجة ؟ لك إخوان هل أنت موظفة أو طالبة ؟
أهم دور هو دور (عابدة) يعني عبادتك لله تعالى
صلاة ذكر قيام ليل وغيره وهي تحتاج دائما شحذ الهمة والتجديد فحلو كل شهر يكون لك هدف فيها.
.
القائمة الأفقية تحتوي على:
الهدف
الوسيلة
الزمن
الإنجاز
لكل دور ثلاث أهداف بالكثير ويفضل هدف واحد
حتى ماتكثر عليك بعدين ماتنفذين كلها
وعلى قولتهم”ركز تنجح” و “ركز تبدع“
بعده حددي وسيلة تحقيق الهدف
مثال:هدفي في دور عابدة أن أصبح كثيرة الاستغفار
الوسيلة:وضع ملصقات في المنزل فيها فضل الاستغفار أو البحث عليه مثل لايزال لسانك رطبا بذكر الله
وطبعا حددي عدد الملصقات وإلي بتكتبينه فيها في خانة الوسائل
الزمن: على المثال السابق تحددين زمن تصميم الملصقات وطباعتها
وتحددين أوقات للاستغفار أو عدد معين خلال اليوم طبعا الاستغفار ورد الإكثار منه فما تعتقدين إنه الشرع ألزم بعدد لكن التحديد عشان يساعدك خاصة في البداية بعدين بإذن الله لسانك يتعود
بعده خانة الإنجاز أو التقييم عشان تتابعبن نفسك فيها هل حققتي الهدف خلال الزمن إلي حددتي أو لا
وتشوفين وش الأسباب إلي ماخلتك تنجزين عشان تتجنبينها مثلا عدم التزامك بالوقت إلي حددتي أو الهدف كان كبير ويحتاج تقسيم ..الخ
.
.
ثانيا: نموذج خطة أسبوعية
طبعا النموذج عادي وممكن تبدعين بتصميمك الخاص
لكن ليش نحط خطة أسبوعية ؟!
عشان تكونين عارفة في بداية كل أسبوع وش عندك ولا تكونين مشتتة
متابعة الإنجاز أسهل وممكن لو حسيتي الهدف كبير تقسمينه على باقي الأسابيع
ومن تجربة لو ماحطيتي المتابعة الأسبوعية نسبة كبيرة من الهدف ما راح تتحقق.
.
.
ثالثا: نموذج ترتيب المهام
يمكن كثير منكم يعرفه صراحة شي جميل خاصة إذا جيتي تكتبين الخطة الشهرية و لقيتي نفسك حوسة امسكي النموذج وشوفي وش الأهداف العاجلة وش الهامة ووزعيها في خط تم الشهرية حسب أهميتها أو كونها عاجلة
مثلا:أنا موظفة أو طالبة وعندي تعبئة نماذج أو تصميم معين أوتسليم بحث أو اختبار
وبنفس الوقت أبي أتعلم برنامج الموسم جرافيك وأبي أصمم كم صورة عن فضل الذكر وأنزلها بحسابي
امسكي هذا النموذج وقسمي أهدافك المهم والعاجل أولا بعدين المهم تحددين له وقت بخطتك وفيه أشياء ممكن بتلقينها غير مهمة تحذفينها
يعني هذا النموذج بخليك تفكرين بهدوء وبسرعة وبرتبك
.
.
هذا من اختراعاتي
مريت بفترة فيه كثير مواضيع ودي أقرها وما عندي وقت
وما أدري من وين أبدأ فجت فكرة هذا الجدول الجميل البسيط
أولا: حددي المجالات إلي حابة تطورين نفسك فيها
ثانياً: العامود الثاني تحددين الموضوعات في كل مجال
ثالثاً: تحديد الكتاب أو المقطع الصوتي إلي بطورك بهذا الموضوع
وهذا العمود يجدد كل أسبوع أو أسبوعين حسب وقتك
رابعاً: عامود تحديد الوقت
خامساً: عامود اختياري إذا ودك تلخصين الكتاب أو المادة الصوتية
وهذا فكرة جميلة عشان تقدرين تنشرين المادة
وتثبت في مخك بعد
إذا لخصتي تكتبين صح في الخانة
.
.
وبس
كذا تكون انتهت تدوينتي, أتمنى تكون مفيدة لكم
وأتمنى تكونون استمتعتوا بقراءة المدونة
التنسيق لكم عليه ; أم جديدة وأدرس في المعهد